Ундны усны хангамжийг сайжруулах төсөл

Говийн бүс нутгийн усны нөөц хомс, газрын доорх ус нь ихэвчлэн хатуулаг болон эрдэсжилт өндөртэй байдаг нь иргэдийн эрүүл мэндэд сөргөөр нөлөөлөх эрсдэлийг дагуулдаг. Энэхүү асуудлыг шийдвэрлэх зорилгоор 2007 онд Дундговь аймгийн Өндөршил суманд ундны ус цэвэршүүлэх системийг суурилуулж, иргэдийг аюулгүй, цэвэр усаар хангах нөхцөлийг бүрдүүлсэн.

Төслийн үр дүнд сумын иргэдийн ундны усны чанар сайжирч, уснаас шалтгаалах эрүүл мэндийн эрсдэл буурсан байна. Сумын эрүүл мэндийн байгууллагын мэдээллээр элэг болон дотоод эрхтний зарим өвчлөлийн түвшин мэдэгдэхүйц буурсан эерэг өөрчлөлт ажиглагджээ. Айл өрхүүдийн ундны усны чанар сайжирч, өдөр тутмын амьдралын чанар дээшилсэн байна.

Төслийн тогтвортой ажиллагааг хангах үүднээс 2025 онд худгийг иж бүрэн шинэчилж, усан хангамжийн найдвартай байдлыг улам бэхжүүлсэн. Энэхүү төсөл нь говийн бүсийн иргэдийн эрүүл мэнд, амьдрах орчныг сайжруулахад бодит хувь нэмэр оруулж үр өгөөж өгч байна.